لەسۆنگەی هەستكردنمان بە ئاڵوگۆڕە گەورەكانی جیهان و، هاتنە پێشەوەی سەردەمی فرەجەمسەری لە دنیادا، هاوكات لەكاتێكدا دەبینین لەڕۆژهەڵات و ڕۆژئاوای جیهاندا، نوسەران و چاودێران و بیرمەندان، سەرقاڵی لێكۆڵینەوە و شرۆڤەكردنی هاتنە پێشەوەی كۆماری میللی چیینن، ئێمەش بەپێویستمان زانی، لەڕێگەی سایتێكی ئەهلییەوە، سەرنجی كورد ڕابكێشین بۆ ئەو ڕووداوە گرنگەی جیهان.
ئێمە چەند ڕۆژنامەنووسێكی سەربەخۆ و بێلایەن، دەمانەوێت هەنگاوەكانی گۆڕانی جیهان لەتاك جەمسەرییەوە بۆ فرەجەمسەری، هەنگاوەكانی چین لەناو خەریتەی گۆڕانكارییەكاندا بەكورد پیشان بدەین.
كورد پێویستە چین بناسێت، وەك مێژوو، وەك مۆدیلی حوكمڕانی، وەك كەلتور و ئابووری… ناكرێت گۆڕانكارییەكی گەورە كە سەرجەم دەوڵەتانی دنیای بەخۆیەوە سەرقاڵ كردووە، لەكوردستان نادیدە بگیرێت.
چین دەیەوێت لەڕێگەی پرۆژەی (پشتوێنە و ڕێگا) وە، بەشداری گەورە بكات لە دیزاینكردنەوەی پەیوەندی نێوان كۆمەڵگەكان و دەوڵەتان لەسەدەی تازەدا. لەو پرۆژەیەدا تاكو ئێستای نوسینی ئەم چەند دێڕە، 164 دەوڵەت بەشدارن.
پرۆژەی پشتوێنە و ڕێگا بەكوردستاندا تێدەپەڕێت، ئەوەش ململانێیەكی جیۆسیاسی گەورەی لێدەكەوێتەوە. كورد پێویستە چاوكراوەبێت و، سەرجەم یاریكەرەكان بناسێت.
چین كەلتورێكی نەرم و، مۆدیلێكی تازەی گەشەی ئابووریی و دەوڵەتدارییە… چین ئادرەسی گەشەی كۆمەڵگە و كۆتایی سەردەمی هەژارییە. بۆیە پێویستە لەو نمونە تێبگەین و بزانین ڕووگەكانی چین و، چۆن كۆدەكانی شیتەڵ بكەین.