لین جیان وتەبێژی وەزارەتی دەرەوەی چین ڕایگەیاند، چین بە توندی ئیدانەی هێرشە ئاسمانییەکەی دۆحەی پایتەختی قەتەر دەکات و بە توندی دژایەتی ئیسرائیل دەکات بۆ پێشێلکردنی سەروەری خاکی قەتەر و ئاسایشی نیشتمانی.
لین لە کۆنگرەیەکی ڕۆژنامەوانی ڕۆژانەدا ڕایگەیاند، چین بە قووڵی نیگەرانە لەوەی کە هێرشە ئاسمانییەکە گرژییەکانی ناوچەکە زیاتر پەرەپێبدات و ناڕازییە لە کردەوەی لایەنە پەیوەندیدارەکان کە بە ئەنقەست دانوستانەکانی ئاگربەست لە غەززە تێکدەدەن.
جەختیشی کردەوە کە هێز ناتوانێت ئاشتی بۆ ڕۆژهەڵاتی ناوەڕاست بهێنێتە ئاراوە، هاوکات گفتوگۆ و دانوستان ڕێگەی سەرەکی دەربازبوونە لەو قەیرانە.
لین بە ئاماژەدان بەوەی کە نزیکەی دوو ساڵە ململانێکانی غەززە بەردەوامە، ئاماژەی بەوەشکرد، چین بە توندی داوا لە هەموو لایەنە پەیوەندیدارەکان دەکات، بەتایبەت ئیسرائیل، هەوڵی کاریگەرتر بدەن بۆ وەستاندنی شەڕەکان و دەستپێکردنەوەی دانوستانەکان، نەک بە ئاراستەی پێچەوانەدا هەنگاو بنێن.
لە وەڵامی پرسیارێکدا سەبارەت بە لێدوانی چین سەبارەت بە ئاگادارکردنەوەی ئەمریکا لە ئیسرائیل پێش دەستپێکردنی هێرشی ئاسمانی بۆ سەر حەماس لە دۆحە، لین وتی، “ئێمە زۆر نیگەرانین لە ڕاپۆرتە پەیوەندیدارەکان”.
ئاماژەی بەوەشکرد، “ئەمە پەیوەندییەکی نزیک بە ناهاوسەنگی جددی و درێژخایەنی هەڵوێستی هەندێک وڵاتی دەرەوەی ڕۆژهەڵاتی ناوەڕاست لەسەر پرسە ناوچەییەکان هەیە”. ناوبراو لە درێژەی قسەکانیدا وتی: ئامۆژگاری هەندێک لە زلهێزەکان دەکەین کە ئاشتی و سەقامگیری لە ناوچەکەدا لە پێشینەی کارەکانیان دابنێن و هەڵوێستێکی دادپەروەرانە و بەرپرسیارانە بگرنەبەر و لەگەڵ کۆمەڵگەی نێودەوڵەتی کاربکەن بۆ ئەوەی ڕۆڵێکی بنیاتنەر ببینن لە بەرەوپێشبردنی ئاگربەست و کۆتاییهێنان بە شەڕ و کەمکردنەوەی گرژییەکان لە ناوچەکەدا.