2025-09-06
لەمەراسیمی یادی 80ساڵەی سەركەوتنی چین بەسەر فاشیزمی ژاپۆنیدا، كە تیایدا گەورەترین نمایشی سەربازی لەمێژوودا ئەنجام درا، سەرۆككۆماری میللی چین، وتارێكی خوێندەوە، ئەمەی خوارەوە دەقەكەیەتی:
میوانە بەڕێزەکان،
دۆستان و هەڤاڵان،
لە سەرەتادا بە ناوی حکومەت و گەلی چینەوە با بەخێرهاتنی دڵسۆزانە لە هەمووتان بکەم. لەم ڕۆژەی یادی سەركەوتندا، گەرمترین پیرۆزباییم لە هەموو ئامادەبووان، لە هاونیشتیمانمان لە هەموو نەتەوەکان، و لە خەڵکی جیهان دەكەم.
هەشتا ساڵ لەمەوبەر گەلی چین دوای ئەوەی بۆ ماوەی ١٤ ساڵ شەڕێکی تاڵ و قارەمانانەی بەرخۆدانی کرد، بە تەواوی شکستی بە دەستدرێژکارە میلیتاریستەکانی ژاپۆن هێنا. ئەمەش سەرکەوتنی تەواوەتی جەنگی جیهانی دژە فاشیستی بوو. خاڵی وەرچەرخانێکی مێژوویی بوو بۆ نەتەوەی چینی کە لە قەیرانە سەختەکانی سەردەمی مۆدێرن دەرچوو بۆ ئەوەی دەست بە گەشتەکە بکات بەرەو گەنجبوونەوەی گەورە؛ هەروەها خاڵی وەرچەرخانێکی گەورە بوو لە ڕەوتی مێژووی جیهاندا.
گەلی چین لە ڕێگەی هەوڵە یەکگرتووەکانی لەگەڵ هێزەکانی هاوپەیمانی دژە فاشیست و گەلانی جیهان، سەرکەوتنی گەورەی بەدەستهێنا. حکومەت و گەلی چین هەرگیز ئەو حکومەتە دەرەکیانە و دۆستانی نێودەوڵەتی لەبیر ناکەن کە پشتیوانی و هاوکاری گەلی چینیان کرد لە بەرەنگاربوونەوەی دەستدرێژییەكەدا.
ئەمڕۆ، نمایشێکی سەربازی گەورە ئەنجام دەدەین بۆ یادکردنەوەی ٨٠ ساڵەی سەرکەوتنی شەڕی بەرخۆدانی گەلی چین لە دژی دەستدرێژی ژاپۆن و جەنگی جیهانی دژە فاشیست. مەبەستمان یادکردنەوەی مێژوو و، ڕێزگرتنە لە پاڵەوانەكان و بە نرخی ئاشتی و دروستکردنی داهاتوویەکی باشتر.
مێژوو پێمان دەڵێت: دەبێت لە قەناعەتمان بە دادپەروەریدا نەلەخشێین، لە پابەندبوونمان بە ئاشتیدا قووڵبین و لە متمانەمان بە هێزی لەبن نەهاتووی خەڵکدا نەلەرزین.
ڕەنگە ئێستا هێز حوکمڕانی سەردەمەكە بکات، بەڵام دوجار ڕاستی بۆ هەمیشە زاڵ دەبێت. بێگومان دادپەروەری و ڕووناکی و پێشکەوتن بەسەر خراپە و تاریکی و دواكەوتندا سەردەکەون. پێویستە هەمیشە بانگەشە بۆ بەها هاوبەشەکانی مرۆڤایەتی بکەین، بەمكوڕی بەرگری بكەین لە دادپەروەری وئینساف لەپەیوەندییە نێودەوڵەتییەكاندا. تاكو سەروەری هەق و تروسكایی ڕووناكی مسۆگەر بكەین.
ئێمەی مرۆڤ هەموومان یەک هەسارەمان هەیە. پێویستە بە هاودەنگی و هاوئاهەنگی پێکەوە کۆببینەوە، دڵنیا بین لەوەی کە هەرگیز یاسای جەنگەڵ ناگەڕێتەوە. هەردەم پێویستە پابەند بین بە ڕێگای گەشەسەندنی ئاشتیانەوە، مكوڕبین لەسەر پاراستنی ئاشتی و ئارامی جیهان، و پێکەوە کار بکەین بۆ بنیاتنانی کۆمەڵگەیەک کە داهاتوویەکی هاوبەشی هەبێت بۆ مرۆڤایەتی.
گەل خوڵقێنەری مێژووە و، بەدواداچوون بۆ ژیانێکی باشتر خواستێکی هاوبەشی هەموو گەلانە. لە هەموو کاتێکدا دەبێت دڵمان لەگەڵ خەڵک بێت، کارەکانمان بۆ گەل بێت، هەموو هەوڵێکمان بۆ باشترکردنی گوزەرانی هەموو خەڵک بێت.
مۆدێرنیزاسیۆنی چینی ڕێبازی گەشەسەندنی ئاشتیانە پەیڕەو دەکات. چین هەمیشە هێزێک دەبێت بۆ ئاشتی و سەقامگیری و پێشکەوتن لە جیهاندا. لە دڵەوە هیوادارین هەموو وڵاتان حیکمەت لە مێژوو وەربگرن و بەهای ئاشتی بدەن و بە هاوبەشی مۆدێرنیزاسیۆنی جیهان پێشبخەن و، داهاتوویەکی باشتر بۆ مرۆڤایەتی دروست بکەن.
بۆ سەرکەوتنی گەورەی شەڕی بەرخۆدانی گەلی چین لە دژی دەستدرێژی ژاپۆن و شەڕی جیهانی دژە فاشیست؛ و
بۆ ئایندەیەکی گەش و ئاشتی بەردەوام و، خۆشگوزەرانی هاوبەش بۆ هەموو مرۆڤایەتی.
بەخۆشی!
