باڵیۆزخانەی چین لە ئوردن ئەمڕۆ (سێشەممە) 60 هەزار پارسێلی خۆراکی ڕادەستی ڕێکخراوی خێرخوازی هاشمیی ئوردن کرد وەک ئامادەکارییەک بۆ ناردنیان بۆ کەرتی غەززە کە بەدەست کەمی پێداویستیی فریاگوزاری و پزیشکییەوە دەناڵێنێت.
باڵیۆزی چین لە ئوردن، چێن کواندۆنگ، لە میانی مەراسیمی ڕادەستکردنەوەیدا کە لە کۆگاکانی دەسەڵات لە ناوچەی ئەلغاباوی لە پارێزگای زەرقا، بە دووری 23 کم لە باکووری ڕۆژهەڵاتی عەممانی پایتەختەوە بەڕێوەچوو، وتی کە لە دوای سەرهەڵدانی ململانێ لە غەززە لە ئۆکتۆبەری 2023، خەڵکی غەززە تووشی کێشەیەکی زۆر بوون و پێویستییەکی زۆریان بەم پێداویستیانە هەیە.
چین وەک دۆستی گەلی فەلەستین و وڵاتێکی بەرپرسی سەرەکی، وەجبەی هاوکاری بۆ خەڵکی غەززە ناردووە.
ئاماژەی بەوەشکرد، چین بەردەوام دەبێت لە هاوکاریکردنی زیاتر بۆ گەلی فەلەستین بۆ کەمکردنەوەی ئازارەکانیان و لە هەمان کاتدا بەردەوام دەبێت لە پێشخستنی چارەسەری سیاسی بۆ پرسی فەڵەستین بە مەبەستی هێنانەدی ئاشتی و گەشەپێدان بۆ تەواوی ناوچەکە.
لە بەرامبەردا، حسێن ئەلشیبلی سکرتێری گشتی ڕێکخراوی خێرخوازی، سوپاس و پێزانینی دڵسۆزانەی خۆی ئاراستەی حکومەت و خەڵکی کۆماری میللی چین کرد بۆ ئەوەی لە کەرتی غەززە بۆ خەڵک دابینی دەکەن.
ئەلشیبلی بە ڕۆژنامەنووسانی ڕاگەیاند، 60 هەزار پارسێلی خۆراک ئامادە دەکرێن و لە ڕۆژانی داهاتوودا بە شەش وەجبە دەنێردرێت، بە هاوکاری ڕێکخراوی خێرخوازی هاشمی ئوردن بۆ یارمەتیدانی خێزانەکانی کەرتی غەززە.
پاکێجەکە پێکهاتووە لە جۆرەها بابەتی خۆراک کە پێداویستی خێزانێکی پێنج کەسی بۆ ماوەی دوو هەفتە دابین دەکات.
ئاماژەی بەوەشکرد، ڕێکخراوی خێرخوازی هاشمیی ئوردن قۆڵی مرۆیی شانشینی هاشمیی ئوردنە و بە هەماهەنگی لەگەڵ دەزگا ناوخۆیی و نێودەوڵەتییەکان و وڵاتانی دۆست و برایانە کاردەکات بۆ ناردنی هاوکاری بۆ کەرتی غەززە.
ناوبراو هیوای خۆی دەربڕی کە لە ڕۆژانی داهاتوودا هاوکاری زیاتر لەگەڵ کۆماری میللی چین هەبێت بۆ یارمەتیدانی خەڵکی پێویست لە کەرتی غەززە و پاڵپشتیکردنیان بۆ ڕووبەڕووبوونەوەی ئەو دۆخەی کە بەدەست سەختییەکانی ژیانەوە دەناڵێنن، هەروەها نەبوونی خۆراک و فریاگوزاری، شوێنی حەوانەوە و کەرەستەی تەندروستی.
